მოგზაურობა შინაურ ცხოველთან ერთად: ყველაფერი მშვიდი და სასიამოვნო დასვენებისთვის

მოგზაურობა შინაურ ცხოველთან ერთად: ყველაფერი მშვიდი და სასიამოვნო დასვენებისთვის

ზაფხული მოგზაურობის სეზონია. ზოგი ზღვას ირჩევს, ზოგი მთას, ზოგი კი შაბათ-კვირას ქალაქგარეთ ატარებს. თუმცა შინაური ცხოველის პატრონებისთვის თითქმის ყველა მოგზაურობა ერთი კითხვით იწყება: წავიყვანო თუ არა ჩემი ოთხფეხა მეგობარი?

საბედნიეროდ, დღეს ამის გაკეთება ბევრად მარტივია, ვიდრე რამდენიმე წლის წინ. საქართველოში სულ უფრო იზრდება pet-friendly სასტუმროების, კოტეჯებისა და ღია სივრცეების რაოდენობა, ამიტომ ბევრი ოჯახი დასვენებას უკვე შინაურ ცხოველთან ერთად გეგმავს. და მართლაც, ძნელია დატოვო სახლში ის, ვინც ყოველდღიურ ცხოვრებაში ოჯახის სრულფასოვანი წევრია.

თუმცა სასიამოვნო მოგზაურობა მხოლოდ დანიშნულების ადგილით არ იწყება. ის იწყება მომზადებით. რამდენიმე მარტივმა ნაბიჯმა შეიძლება გზა ბევრად უფრო მშვიდი, უსაფრთხო და კომფორტული გახადოს როგორც თქვენთვის, ისე თქვენი ოთხფეხა მეგობრისთვის.

როგორ მოვამზადოთ შინაური ცხოველი მოგზაურობისთვის?

თუ თქვენი ძაღლი ან კატა ხშირად არ მგზავრობს, ნუ ელოდებით, რომ რამდენიმე საათიან გზას პირველივე ცდაზე მშვიდად გადაიტანს. უცნობი გარემო, მანქანის ხმა, მოძრაობა და ახალი სუნები ბევრი ცხოველისთვის სტრესის მიზეზია.

ამიტომ სასურველია, მოგზაურობამდე რამდენიმე დღით ან კვირით ადრე პატარა „ვარჯიში“ დაიწყოთ. ჯერ უბრალოდ დასხედით მანქანაში რამდენიმე წუთით, შემდეგ მოკლე მანძილზე გაისეირნეთ და ყოველი მშვიდი მგზავრობის შემდეგ შეაქეთ ან სასუსნავით დააჯილდოვეთ. ასე მანქანა ნელ-ნელა სასიამოვნო გამოცდილებასთან ასოცირდება და არა მხოლოდ ვეტერინართან ვიზიტთან.

თუ წინ ხანგრძლივი გზა გელოდებათ, სასურველია, მანამდე ვეტერინართანაც გაიაროთ კონსულტაცია, განსაკუთრებით მაშინ, თუ ცხოველს ჯანმრთელობის პრობლემები აქვს ან პირველად მოგზაურობს.

რატომ ხდება მანქანა ზოგისთვის სტრესის მიზეზი?

ალბათ შეგიმჩნევიათ, რომ ზოგი ძაღლი მანქანაში მოუსვენარი ხდება, ხშირად ამთქნარებს, ტუჩებს ილოკავს ან აღებინებს. ეს ხშირად მგზავრობით გამოწვეული გულისრევის ან შფოთვის ნიშნებია.

განსაკუთრებით ხშირად ეს ლეკვებში გვხვდება, რადგან მათი წონასწორობის სისტემა ჯერ ბოლომდე განვითარებული არ არის. კარგი ამბავი ისაა, რომ ბევრ შემთხვევაში ასაკთან ერთად ეს პრობლემა მცირდება.

თუ თქვენი ძაღლი მანქანას მხოლოდ ვეტერინართან ვიზიტს უკავშირებს, მასზე უარყოფითი ემოციებიც უფრო ადვილად უყალიბდება. სწორედ ამიტომ სასარგებლოა ხანდახან უბრალოდ სასეირნოდ ან ბუნებაში წასვლა, რათა მანქანა მისთვის სასიამოვნო თავგადასავლების ნაწილად იქცეს.

ხანგრძლივი მგზავრობის წინ ბევრი ვეტერინარი ასევე ურჩევს პატრონებს, ცხოველი გამგზავრებამდე რამდენიმე საათით ადრე არ გამოკვებონ, თუმცა ეს ყოველთვის ინდივიდუალურია და უმჯობესია, რეკომენდაცია სპეციალისტისგან მიიღოთ.

უსაფრთხომგზავრობაკომფორტითიწყება

მოგზაურობისას ყველაზე დიდი შეცდომა ის არის, როდესაც ცხოველი მანქანაში თავისუფლად გადაადგილდება.

ერთი შეხედვით შეიძლება ჩანდეს, რომ ასე უფრო კომფორტულად გრძნობს თავს, თუმცა რეალურად მოულოდნელი დამუხრუჭების ან შეჯახების დროს ეს სერიოზულ საფრთხეს ქმნის როგორც ცხოველისთვის, ისე მგზავრებისთვის.

ბევრი ცხოველი გაცილებით მშვიდად მგზავრობს მაშინ, როდესაც საკუთარი სივრცე აქვს. კომფორტული გადამყვანი ან სამგზავრო ჩანთა მხოლოდ ტრანსპორტირების საშუალება არ არის — ის ცხოველისთვის ნაცნობი და უსაფრთხო გარემოა.

სწორედ ამიტომ კარგი იდეაა, გადამყვანი მხოლოდ გამგზავრების დღეს არ გამოიღოთ. თუ მას რამდენიმე დღით ადრე სახლში დადებთ, შიგნით საყვარელ პლედს, სათამაშოს ან სასუსნავს ჩაუდებთ და ცხოველს თავისუფლად მისცემთ შესვლის საშუალებას, დიდი შანსია, გზის დაწყებისას მასში ბევრად მშვიდად მოთავსდეს.

ზაფხულში მგზავრობასთავისიწესებიაქვს

ზაფხულის სიცხე შინაური ცხოველებისთვის ისეთივე დამღლელია, როგორც ადამიანებისთვის, ზოგ შემთხვევაში კი უფრო მეტადაც.

მანქანაში ყოველთვის უზრუნველყავით კარგი ვენტილაცია, ხშირად შესთავაზეთ სუფთა წყალი და ხანგრძლივი მგზავრობისას ყოველ რამდენიმე საათში ერთხელ შეისვენეთ, რათა  გაიაროს, დაისვენოს და წყალი დალიოს.

ყველაზე მნიშვნელოვანი წესი კი ერთია — არასოდეს დატოვოთ შინაური ცხოველი მარტო გაჩერებულ მანქანაში. დახურულ სალონში ტემპერატურა რამდენიმე წუთში შეიძლება სიცოცხლისთვის საშიშ ნიშნულამდე გაიზარდოს, მაშინაც კი, თუ გარეთ ეს განსაკუთრებით საგრძნობი არ არის.

დანიშნულების ადგილზე მისვლისთანავე ნუ ელოდებით, რომ თქვენი ცხოველი მაშინვე თავს სახლში იგრძნობს.

მისთვის ყველაფერი ახალია — სუნები, ხმები, ადამიანები, გარემო. მიეცით დრო, რომ ნელ-ნელა შეისწავლოს სივრცე და საკუთარ ტემპში შეეგუოს ახალ გარემოს.

თუ ზღვაზე ისვენებთ, ყოველთვის თან იქონიეთ სუფთა სასმელი წყალი. ზღვის წყლის დიდი რაოდენობით მიღებამ შეიძლება კუჭის გაღიზიანება, ღებინება ან გაუწყლოება გამოიწვიოს. ასევე ეცადეთ, დღის ყველაზე ცხელ მონაკვეთში მზეზე დიდხანს არ დარჩეს და ყოველთვის ჰქონდეს ჩრდილში დასვენების შესაძლებლობა.

სახლში დაბრუნების შემდეგ კი სასურველია, ბეწვიდან მარილი, ქვიშა ან მტვერი ჩამობანოთ, რათა კანი და ბეწვი ზედმეტად არ გაუღიზიანდეს.

რა არ უნდა დაგრჩეთ სახლში?

ხშირად ყველაზე მნიშვნელოვანი ნივთები სწორედ გამგზავრებისას გვრჩება.

სანამ გზას დაადგებით, დარწმუნდით, რომ თან გაქვთ ცხოველის ყოველდღიური საკვები, სუფთა წყალი, დასაკეცი ჯამი, საყელო ი და საბელი, ჰიგიენისთვის საჭირო ნივთები, საჭიროების შემთხვევაში მედიკამენტები. 

და რა თქმა უნდა, ნუ დაგავიწყდებათ ის ნივთი, რომელიც მთელი მგზავრობის განმავლობაში ყველაზე ხშირად დაგჭირდებათ — კომფორტული და სწორად შერჩეული გადამყვანი ან სამგზავრო ჩანთა.

ყველაზე კარგი მოგონებები ერთად იქმნება

ჩვენთვის მოგზაურობა დასვენებას, ახალ ადგილებსა და შთაბეჭდილებებს ნიშნავს. ძაღლებისა და კატებისთვის კი ეს პირველ რიგში ახალი სუნების, გარემოსა და გამოცდილების აღმოჩენაა. სწორედ ამიტომ, სწორად დაგეგმილი მოგზაურობა მათთვისაც ისეთივე საინტერესო შეიძლება იყოს, როგორც ჩვენთვის.

მეტი მომზადება, უსაფრთხოების რამდენიმე მარტივი წესი და ყურადღება საკმარისია იმისთვის, რომ ზაფხულის თავგადასავალი სასიამოვნო მოგონებად იქცეს მთელი ოჯახისთვის — მათ შორის იმ ოჯახის წევრისთვისაც, რომელიც ყველაფერს ოთხი თათით აღმოაჩენს.