ჯანმრთელი ცხოველის საიდუმლო: პროდუქტები, რომლებიც შენს სამზარეულოში ძაღლისთვის აკრძალულია
როდესაც ჩვენი ოთხფეხა მეგობრები სევდიანი თვალებით შემოგვყურებენ და საჭმელს გვთხოვენ, მათთვის უარის თქმა ძალიან რთულია. თუმცა, სანამ საკუთარ საკვებს გაუყოფთ, აუცილებლად უნდა იცოდეთ, არის თუ არა ეს პროდუქტი ძაღლისთვის უსაფრთხო. ის, რაც ადამიანისთვის გემრიელი და სასარგებლოა, ოთხფეხა მეგობრისთვის შესაძლოა საზიანო აღმოჩნდეს.
ამ სტატიაში, პროფესიონალ ვეტერინარებზე დაყრდნობით, განვიხილავთ 4 პოპულარულ პროდუქტს, რომლებიც ხშირად გვხვდება ჩვენს სამზარეულოში.
მარწყვი — ტკბილი და სასარგებლო ნუგბარი🍓
შეიძლება თუ არა? პასუხი: კი, თუმცა ზომიერად!
ახალი ან გაყინული მარწყვი თქვენი ძაღლისთვის შესანიშნავი ნუგბარია. ის მდიდარია კალიუმით, ბოჭკოვანი ნივთიერებებით (რაც საჭმლის მონელებას ეხმარება) და ვიტამინებით (C, B6, K). მარწყვში არსებული ანტიოქსიდანტები იცავს ძაღლის ორგანიზმს და აძლიერებს იმუნურ სისტემას.
როგორ მივცეთ უსაფრთხოდ:
- აუცილებლად კარგად გარეცხეთ და მოაცილეთ მწვანე ღეროები და ფოთლები (ისინი ტოქსიკური არ არის, მაგრამ ძაღლის კუჭს მათი მონელება უჭირს).
- დაჭერით პატარა ნაჭრებად, რათა ძაღლს არ გადასცდეს. ლეკვებისთვის ან პატარა ჯიშებისთვის შეგიძლიათ პიურეც მოამზადოთ.
- გაყინული მარწყვი ზაფხულის სიცხეში შესანიშნავი გამაგრილებელი საშუალებაა, თუმცა ცოტათი შეათბეთ, რომ ძაღლმა კბილები არ დაიზიანოს.
მნიშვნელოვანი გაფრთხილება: არასოდეს მისცეთ ძაღლს მარწყვის იოგურტი, ნაყინი ან მარწყვის კონსერვები. ისინი შეიცავენ დიდი რაოდენობით შაქარს, რამაც დროთა განმავლობაში შესაძლოა დიაბეტი და სიმსუქნე გამოიწვიოს. ასევე, გაითვალისწინეთ რომ ძალიან ცოტა რაოდენობა უნდა მსიცეთ.
ხახვი — კატეგორიული უარი!
შეიძლება თუ არა? პასუხი: არა, არავითარ შემთხვევაში!
ხახვი ძაღლისთვის ერთ-ერთი ყველაზე საშიში პროდუქტია. მნიშვნელობა არ აქვს, ხახვი უმია, მოხარშული, შემწვარი თუ ფხვნილის სახით — მომზადების პროცესი მის ტოქსიკურობას არ ამცირებს. საშიშია ხახვის ყველა სახეობა (წითელი, თეთრი, ყვითელი, მწვანე ხახვი) და მისი ოჯახის სხვა წევრებიც (პრასი).
ხახვი შეიცავს ნივთიერებას, რომელიც ძაღლის სისხლის წითელ უჯრედებს აზიანებს და ანემიას იწვევს.ნიშნები, რომლებსაც ყურადღება უნდა მიაქციოთ: მოთენთილობა და უენერგიობა, მადის დაკარგვა, ფერმკრთალი ღრძილები, მუქი (მოწითალო-ყავისფერი) შარდი.
რა რაოდენობაა საშიში? ძაღლის წონის სულ რაღაც 0.5%. მაგალითად: თუ ძაღლი 4.5 კილოს იწონის, მისთვის 22 გრამი ხახვიც (დაახლოებით ერთი პატარა ნაჭერი) უკვე სახიფათოა.
მნიშვნელოვანია: ხახვის მიმართ განსაკუთრებით მგრძნობიარეები იაპონური ჯიშები არიან (აკიტა, შიბა ინუ).
თუ იცით, რომ ძაღლმა ხახვი შეჭამა, სიმპტომების გამოჩენას ნუ დაელოდებით — ჯობია დაუყოვნებლივ ვეტერინარს დაურეკოთ კონსულტაციისთვის.
სოკო — გააჩნია სოკოს
შეიძლება თუ არა? პასუხი: მაღაზიის — კი, ტყის — კატეგორიულად არა!
აქ წესი მარტივია: სუპერმარკეტში ნაყიდი კულტივირებული სოკო (ქამა, შამპინიონი, და ა.შ.) ძაღლისთვის უსაფრთხოა. თუმცა, ველური, ტყეში ან ეზოში ამოსული სოკოები უდიდეს საფრთხეს შეიცავს.
როგორ მივცეთ უსაფრთხოდ (მაღაზიის სოკო):
- მიეცით მხოლოდ კარგად გარეცხილი და დაჭრილი.
- მოამზადეთ კარაქის, ზეთის, მარილის და, რაც მთავარია, ხახვისა და ნივრის გარეშე.
ტყის სოკოს საფრთხე: ზოგიერთი ველური სოკო იმდენად ტოქსიკურია, რომ მისი ნახევარიც კი საკმარისია ზრდასრულ ძაღლს ფატალური ზიანი მიაყენოს. ვინაიდან შხამიანი და უსაფრთხო სოკოების ერთმანეთისგან გარჩევა რთულია, ძაღლს ტყეში სეირნობისას ყოველთვის გაუკეთეთ საბელი. თუ ძაღლმა უცნობი სოკო შეჭამა, ეს ვეტერინარული გადაუდებელი შემთხვევაა! სიმპტომებია: პირღებინება, დიარეა, კანკალი, კრუნჩხვები და ღვიძლის უკმარისობა.
ნიორი — ხახვზე უფრო ძლიერი საწამლავი
შეიძლება თუ არა? პასუხი: არა, კატეგორიულად არა!
არსებობს მითი, თითქოს ნიორი ბუნებრივი საშუალებაა რწყილებისა და ტკიპების წინააღმდეგ, თუმცა ეს სიმართლეს არ შეესაბამება და რისკი იმდენად დიდია, რომ არ ღირს. გამოიყენეთ მხოლოდ ვეტერინარის მიერ რეკომენდებული პრეპარატები.
რატომ არის საშიში: ნიორი იმავე ოჯახიდანაა, საიდანაც ხახვი, თუმცა მასზე ბევრად უფრო კონცენტრირებული და ტოქსიკურია. ის მომენტალურად აზიანებს სისხლის წითელ უჯრედებს და იწვევს სიცოცხლისთვის საშიშ ანემიას. საშიშია ნივრის ნებისმიერი ფორმა: უმი, მოხარშული, გამომშრალი თუ ნივრის ფხვნილი.
ნივრიანი პური: ხშირად ძაღლები ჩვენს ნივრიან პურს თვალს ადგამენ. მიუხედავად იმისა, რომ ერთი პატარა ლუკმა შეიძლება ანემიის გამოსაწვევად საკმარისი არ იყოს, მასში არსებულმა კარაქმა, ზეთებმა და სანელებლებმა შესაძლოა ძაღლის კუჭის სერიოზული აშლილობა გამოიწვიოს. ასე რომ, ნივრიანი პური მხოლოდ ადამიანებისთვის დატოვეთ.
თქვენი ძაღლის ჯანმრთელობა თქვენს ხელშია. თუ გსურთ მისი განებივრება, საუკეთესო გზა სპეციალური ძაღლის ნუგბარი ან ვეტერინართან შეთანხმებული უსაფრთხო ხილი და ბოსტნეულია. ნებისმიერი საეჭვო სიმპტომის დროს კი დაუყოვნებლივ მიმართეთ ვეტერინარს!