ალბათ ეს კითხვა ბევრი კატის მოყვარულს უჩნდება, რადგან ვიცით, რომ კატები ბუნებით ძალიან სუფთა ცხოველები არიან. მათ არ სჭირდებათ ისეთი რეგულარული დაბანა, როგორც ეს ძაღლების შემთხვევაშია საჭირო. კატები საკუთარ თავს კარგად ისუფთავებენ თავიანთი უხეში ენის დახმარებით. თუმცა არის შემთხვევები, როდესაც საჭირო ხდება ჩვენი კატა თავად დავბანოთ. ზოგიერთმა თქვენგანმა შეიძლება ისიც ჰკითხოს საკუთარ თავს: „უსაფთხოა კატის დაბანა?“ და პასუხი არის - დიახ! სინამდვილეში, კატის დაბანა შეიძლება ბევრი მიზეზის გამო გახდეს საჭირო. მაგალითად, თუ ისინი: 

•        მოხვდნენ რაიმე ძალიან ბინძურში ან წებოვანში

•        საჭიროებენ პარაზიტების ან სოკოს საწინააღმდეგო მედიკამენტის ჩამობანას და სხვა

და მაინც, რამდენად ხშირად სჭირდება კატას დაბანა? ეს დამოკიდებულია რამდენიმე ფაქტორზე, მათ შორის:

•        სახლის კატა გყავთ თუ თქვენი ოთხფეხა მეგობარი ეზოს ხშირი სტუმარია? ეზოს კატებს უფრო მეტად სჭირდებათ კარგი აბაზანა, ვიდრე სახლის კატებს.

•        რა სიგრძისაა მათი ბეწვი? ბუნებრივია, გრძელბეწვიან კატებს უფრო მეტი მოვლა სჭირდებათ, თუმცა უბეწვო კატას მაინც დასჭირდება დროდადრო აბაზანის მიღება. 

•        რამდენად აქტიურები არიან ისინი? აქტიურ კატას უფრო რეგულარულად დასჭირდება გაწმენდა

•        აქვთ თუ არა მათ ჯანმრთელობის პრობლემები, როგორიცაა პარაზიტები ან კატის კანისთვის დამახასიათებელი სხვა პრობლემები? თქვენს კატას ამ შემთხვევებშიც შესაძლოა მეტჯერ დასჭირდეს აბაზანის მიღება.

როგორ შევარჩიოთ სწორად კატის შამპუნი?

კატის დაბანამდე აუცილებელია სწორად შევარჩიოთ შამპუნი. მნიშვნელოვანია სპეციალურად კატებისათვის შექმნილი შამპუნის გამოყენება. კატის დასაბანად რეკომენდირებული არ არის არც ძაღლის და არც ადამიანის შამპუნი. ისინი აზიანებენ კატის კანსა და ბეწვს.

დღესდღეობით კატის შამპუნებს მრავალი სახით შეხვდებით. მოდით განვიხილოთ 3 ძირითადი მათგანი:

თხევადი შამპუნი - არსებობს თხევადი შამპუნები სხვადასხვა სურნელით, ასევე ვხვდებით ტკიპების და რწყილების საწინააღმდეგო თხევად შამპუნებსაც. მათი დახმარებით ერთდოულად ვზრუნავთ კატის ბეწვზეც და თან ვებრძვით პარაზიტებსაც.

მშრალი შამპუნი (პუდრის სახით) - მშრალი შამპუნი საკმაოდ პრაქტიკულია, განსაკუთრებით გრძელ ბეწვიან ფისოებისთვის, რადგან მისი გამოყენების შემდეგ კატის გაშრობა აღარ არის აუცილებელი. თუმცა შამპუნს ვერ გამოიყენებთ ისეთი კატებისთვის, რომლებიც არ არიან მიჩვეულები გამოვარცხნას. მშრალი შამპუნი არის პუდრის კონსისტენციის, რომელიც ცხოველზე დაყრის შემდეგ კარგად უნდა გამოივარცხნოს. ამის შედეგადაც კატას სცილდება ზედმეტი ბეწვი ჭუჭყთან ერთად. 

მშრალი წმენდის ქაფი-შამპუნი - ქაფი-შამპუნები საკმაოდ მარტივი გამოყენებისაა და იდეალურია რთულად დასაბანი კატებისთვის. ქაფი იწოვს ჭუჭყს კატის ბეწვიდან და კანიდან, ამის შემდეგ კი თქვენი ოთხფეხა მეგობრის გასუფთავება შეგიძლიათ პირსახოცით.

კატების უმრავლესობას არ უყვარს ბანაობა. ისინი ამ დროს დიდ სტრესს განიცდიან, ამიტომ თუ გადაწყვეტთ კატის აყვანას უმჯობესი იქნება, თუ მას კნუტობიდანვე მიაჩვევთ ბანაობის რუტინას. ზრდასრული კატის დაბანა, რომელიც არ არის მიჩვეული დასველებას, ძალიან რთულია.