რატომ არ სძინავთ კატებს ღამით? რჩევები მშვიდი ძილისთვის

ნაცნობი სიტუაციაა? დილის ოთხი საათია, ტკბილად გძინავთ და უეცრად გესმით, როგორ დარბის თქვენი ფუმფულა მეგობარი ოთახებში, ახტება ავეჯს ან პირდაპირ თქვენს ფეხებზე იწყებს „ნადირობას“. ასეთ დროს ბევრი ფიქრობს, რომ კატა ღამის ცხოველია, თუმცა სინამდვილეში ეს ასე არ არის.
 მართალია, კატებს დღის უმეტესი ნაწილი სძინავთ, მაგრამ ისინი ღამის ცხოველები კი არა, ბინდის ბინადარნი არიან. მათი ბუნებრივი აქტიურობის პიკი სწორედ განთიადსა და მზის ჩასვლას ემთხვევა. ველურ ბუნებაში მათი წინაპრები სწორედ ამ დროს ნადირობდნენ, რადგან ნახევრად სიბნელეში კატის თვალი იდეალურად ხედავს, მსხვერპლს კი მისი შემჩნევა უჭირს.

რატომ ატარებენ კატები მთელ დღეს ძილში?

ზრდასრულ კატას დღე-ღამეში 12-იდან 16 საათამდე სძინავს, კნუტებსა და ასაკოვან კატებს კი – 20 საათამდეც კი. თუ ფიქრობთ, რომ ის უბრალოდ ზარმაცია, ცდებით. ველური ინსტინქტი მას კარნახობს, რომ ნადირობას დიდი ენერგია სჭირდება, რომელსაც აღდგენა სურს.
 ამასთან, კატის ძილის 75% უბრალო, 15-30 წუთიანი ჩათვლემაა. ამ დროს თვალები დახუჭული აქვს, მაგრამ ყურები ყოველ ხმაურს აფიქსირებს, ხოლო ღრმა ძილით მათ მხოლოდ 5-10 წუთით სძინავთ. გარდა ამისა, ხშირად ძილის მიზეზი ჩვეულებრივი მოწყენილობაა — თუ სახლში გასართობი ან საკუთარი მყუდრო კუთხე არ აქვს, ის ენერგიის დახარჯვის სანაცვლოდ ძილს ირჩევს.

როგორ დავიბრუნოთ მშვიდი ღამეები?

იმისათვის, რომ კატამ ღამე მშვიდად გაატაროს და დილით ადრე არ შეგაწუხოთ, რამდენიმე პრაქტიკული ნაბიჯია საჭირო:

მოუწყვეთ საკუთარი, მყუდრო კუთხე: კატებს უყვართ სითბო და ისეთი ადგილები, სადაც თავს უსაფრთხოდ იგრძნობენ. ამისთვის იდეალურია დახურული სახლი-საფხაჭნი, რომელიც კატის პატარა „ბუნაგის“ როლს ასრულებს და სტრესს ამცირებს. ასევე მნიშვნელოვანია რბილი და თბილი საწოლები, განსაკუთრებით ასაკოვანი კატებისთვის.

შეარჩიეთ სწორი ლოკაცია: საწოლი თუ სახლი ჯობს შემაღლებულ, თბილ და მშვიდ კუთხეში დადგათ. ფანჯარასთან ახლოს დადგმული საწოლი კი დღისით მათთვის საყვარელი ადგილი გახდება, საიდანაც გარემოს დააკვირდბა და მზესაც მიეფიცხება.  

დაახარჯინეთ ენერგია ძილის წინ: დაძინებამდე 15-20 წუთით ადრე ითამაშეთ კატასთან, შემდეგ კი აჭამეთ. მაძღარი და ენერგიადახარჯული კატა მთელ ღამეს ტკბილად გაატარებს.

 რა არ უნდა გავაკეთოთ, როცა კატა დილის 4 საათზე გვაღვიძებს?

ხშირად პატრონები უნებლიეთ თავად აჩვევენ კატას ცუდ ჩვევებს. თუ კატის კნავილზე წამოდგებით და საჭმელს ჩაუყრით, ის მიხვდება, რომ ეს მეთოდი ჭრის და ყოველ დილით გაგაღვიძებთ. ასევე მოერიდეთ ყვირილს — ჩხუბი კატისთვის მაინც ყურადღების მიქცევაა და პრობლემას არ აგვარებს. ამ დროს იგნორირება საუკეთესო გამოსავალია; თავიდან გაუჭირდება, მაგრამ დროთა განმავლობაში მიხვდება, რომ დილის ოთხ საათზე თქვენგან რეაქციას ვერ მიიღებს.

როდის მივმართოთ ვეტერინარს?

თუ შეამჩნევთ, რომ კატამ უეცრად და მკვეთრად შეიცვალა ძილის რეჟიმი (დაიწყო ბევრად მეტი ან ნაკლები ძილი, გახდა აგრესიული, ეცვლება მადა ან ხშირად მიდის ტუალეტთან), ეს შესაძლოა ჯანმრთელობის პრობლემაზე მიუთითებდეს —ასეთ დროს აუცილებლად გაიარეთ კონსულტაცია ვეტერინართან.