სეზონის ცვლილება და ოთხფეხა მეგობრები: მნიშვნელოვანი რჩევები მათი ჯანმრთელობისთის
როცა დღეები მოკლდება, ჰაერში სიცივე უკვე იგრძნობა და სახლში უფრო ხშირად ვეძებთ მყუდრო კუთხეს, ცვლილებებს ჩვენი ოთხფეხა მეგობრებიც გრძნობენ. მათი ყოველდღიური ჩვევები, ბეწვის მდგომარეობა და საჭიროებებიც შეიძლება შეიცვალოს.
ამ პერიოდში განსაკუთრებით მნიშვნელოვანია ბეწვის მოვლა, კვების თავისებურებების გათვალისწინება და სახლში ისეთი გარემოს შექმნა, სადაც ჩვენს ცხოველს დასვენება და სითბოში მოკალათება შეეძლება.
მოდი, ვნახოთ, რა უნდა გავითვალისწინოთ სეზონის ცვლილებისას და როგორ გავხადოთ ეს პერიოდი ჩვენი ოთხფეხა მეგობრებისთვის უფრო კომფორტული.
რატომ იმატებს ბეწვის ცვენა?
თუ ბოლო პერიოდში სახლში ჩვეულებრივზე მეტი ბეწვი შენიშნე, შესაძლოა, ამის მიზეზი სეზონური ცვენა იყოს.
ძაღლებსა და კატებში ბეწვის ზრდისა და ცვენის ციკლი ბუნებრივად მიმდინარეობს. ბევრ ცხოველში ეს პროცესი სეზონების ცვლილებისას უფრო შესამჩნევი ხდება. შემოდგომაზე ზოგიერთი მათგანი ზაფხულის ბეწვს იცვლის და უფრო ცივი ამინდისთვის ემზადება. თუმცა ცვენის ინტენსივობა განსხვავდება ბეწვის ტიპის, ცხოვრების პირობებისა და ინდივიდუალური თავისებურებების მიხედვით. სახლში მცხოვრებ ცხოველებში ბეწვის ცვენა მთელი წლის განმავლობაშიც შეიძლება შეინიშნებოდეს.
როგორ დავეხმაროთ მათ ამ პერიოდში?
რეგულარული დავარცხნა ბეწვის მოვლის ერთ-ერთი მნიშვნელოვანი ნაწილია. ის ხელს უწყობს მოშვებული ბეწვის მოცილებას, ამცირებს სახლში მიმოფანტული ბეწვის რაოდენობას და გვეხმარება კანის მდგომარეობის შემოწმებაშიც. შეარჩიე სავარცხელი ან ჯაგრისი შენი ცხოველის ბეწვის ტიპის მიხედვით და დავარცხნისას მოერიდე უხეშ მოძრაობებს.
ასევე მნიშვნელოვანია კანისა და ბეწვის მდგომარეობაზე დაკვირვება. დაბალანსებული კვება ორგანიზმს საჭირო საკვები ნივთიერებებით უზრუნველყოფს, რაც კანისა და ბეწვის ჯანმრთელობისთვის აუცილებელია.
თუ ბეწვის ცვენას თან ახლავს ქავილი, კანის გაღიზიანება ან გამელოტებული უბნები, მიზეზი მხოლოდ სეზონური ცვლილება შეიძლება არ იყოს. ასეთ შემთხვევაში ვეტერინართან კონსულტაცია მნიშვნელოვანია.
ბეწვის მოვლა მხოლოდ დავარცხნით არ შემოიფარგლება
კანისა და ბეწვის ჯანმრთელობაში კვებაც მნიშვნელოვან როლს ასრულებს. ცილები, ცხიმოვანი მჟავები, ვიტამინები და მინერალები ორგანიზმის ნორმალური ფუნქციონირებისთვის აუცილებელია, მათ შორის — ჯანსაღი კანისა და ბეწვის შესანარჩუნებლად.
სწორედ ამიტომ, მნიშვნელოვანია ცხოველის ასაკის, ზომის, აქტივობისა და ინდივიდუალური საჭიროებების შესაბამისი, სრულფასოვანი და დაბალანსებული საკვების შერჩევა.
ხშირად გვგონია, რომ ბეწვის ცვენის დროს დამატებითი ვიტამინები ყველა შემთხვევაში სასარგებლოა. სინამდვილეში, თუ ცხოველი სრულფასოვან და დაბალანსებულ საკვებს იღებს, დამატებითი დანამატები ყოველთვის საჭირო არ არის. მათი გამოყენების საკითხი უმჯობესია ვეტერინართან შეთანხმდეს, განსაკუთრებით მაშინ, თუ ბეწვის მდგომარეობა მკვეთრად შეიცვალა.
კატები, ბეწვის გუნდები და მალტ პასტები
კატები დღის მნიშვნელოვან ნაწილს საკუთარი ბეწვის მოვლას უთმობენ. ლოკვისას მათ ბეწვი ეყლაპებათ, რომლის დიდი ნაწილიც საჭმლის მომნელებელი სისტემიდან ბუნებრივად გამოიყოფა. თუმცა ზოგჯერ ბეწვი კუჭში გროვდება და გუნდებად ყალიბდება, რომელთა ამოღებასაც კატა ღებინებით ცდილობს.
ბეწვის ცვენის პერიოდში გადაყლაპული ბეწვის რაოდენობა შეიძლება გაიზარდოს, ამიტომ ამ დროს რეგულარული დავარცხნა განსაკუთრებით სასარგებლოა.
ზოგიერთ შემთხვევაში ბეწვის გუნდების მართვაში სპეციალური საკვები ან მალტ პასტაც შეიძლება დაგვეხმაროს. ასეთი პროდუქტები კონკრეტული დანიშნულებით გამოიყენება და მათი შერჩევა კატის საჭიროებებისა და პროდუქტის ინსტრუქციის მიხედვით უნდა მოხდეს.
მნიშვნელოვანია გვახსოვდეს: თუ კატას ხშირად აქვს ღებინება, უშედეგოდ ცდილობს ღებინებას, უარს ამბობს საკვებზე ან მოდუნებულია, მხოლოდ ბეწვის გუნდებს ნუ დავაბრალებთ — საჭიროა ვეტერინართან დროული კონსულტაცია.
იცვლება თუ არა ცხოველის კვების საჭიროებები გრილ ამინდში?
ამინდის ცვლილებასთან ერთად შეიძლება შეიცვალოს ცხოველის აქტივობაც. მაგალითად, ძაღლმა, რომელიც ზაფხულში მეტ დროს ატარებდა გარეთ, გრილ ამინდში შესაძლოა ნაკლები იმოძრაოს. თუმცა ყველა ცხოველის კვების საჭიროება ერთნაირად არ იცვლება.
საკვების რაოდენობა უნდა შეესაბამებოდეს ცხოველის ასაკს, წონას, აქტივობასა და ჯანმრთელობის მდგომარეობას. მხოლოდ იმიტომ, რომ ამინდი გაცივდა, ულუფის გაზრდა საჭირო არ არის. განსაკუთრებით მნიშვნელოვანია წონის კონტროლი იმ ცხოველებში, რომლებიც ძირითადად სახლში ცხოვრობენ და ნაკლებად აქტიურობენ.
თუ საკვების შეცვლას გადაწყვეტ, ახალი საკვები რაციონში თანდათანობით შეიტანე, დაახლოებით ერთი კვირის ან მეტი პერიოდის განმავლობაში, რათა საჭმლის მომნელებელ სისტემას ადაპტაციისთვის დრო ჰქონდეს.
არ დაგავიწყდეს სუფთა წყალიც — მისი მუდმივი ხელმისაწვდომობა წლის ნებისმიერ დროს მნიშვნელოვანია.
მყუდრო ადგილი, სადაც დასვენება ყოველთვის სასიამოვნოა
როცა ამინდი გრილდება, თბილი და კომფორტული დასასვენებელი ადგილის მნიშვნელობაც იზრდება. ზოგი ცხოველი საყვარელ დივანს ირჩევს, ზოგი — ფანჯრის რაფას, ზოგი კი სახლში ყველაზე რბილ ქსოვილს პოულობს და იქ მოკალათებას ამჯობინებს.
ძაღლისა თუ კატის საკუთარი საწოლი მათთვის მშვიდი დასვენების სივრცის შექმნაში გვეხმარება. შეარჩიე ისეთი ზომისა და ფორმის საწოლი, რომელშიც ცხოველი თავისუფლად დაწვება და კომფორტულ პოზას მიიღებს.
განათავსე ის წყნარ, მშრალ ადგილას, ორპირი ქარისგან მოშორებით. საწოლის მოვლისას გაითვალისწინე მწარმოებლის ინსტრუქციებიც, რათა ის სუფთა და კომფორტული იყოს.
განსაკუთრებული ყურადღება მიაქციე ლეკვებს, კნუტებს, ხანდაზმულ ცხოველებსა და მათ, ვისაც ჯანმრთელობის მდგომარეობის გამო დამატებითი კომფორტი სჭირდება.
ზრუნვა ყველა სეზონზე
ცხოველის ყოველდღიურობაში ზოგჯერ პატარა ცვლილებებიც მნიშვნელოვანია — რეგულარული დავარცხნა, სწორად შერჩეული საკვები, საჭიროების შემთხვევაში დამატებითი მოვლის საშუალებები და დასასვენებლად მოწყობილი მყუდრო ადგილი.
არ არის აუცილებელი, სეზონის ცვლილებასთან ერთად ყველაფერი შევცვალოთ. მთავარია, დავაკვირდეთ ჩვენს ოთხფეხა მეგობრებს, გავითვალისწინოთ მათი ინდივიდუალური საჭიროებები და საჭიროების შემთხვევაში ვეტერინარს მივმართოთ.
რადგან მათთვის ზრუნვა მხოლოდ განსაკუთრებულ დღეებს არ უკავშირდება — ის ყოველდღიური პატარა გადაწყვეტილებებისგან შედგება.