ზაფხული და შინაური ცხოველები: მნიშვნელოვანი რჩევები მათი ჯანმრთელობისთვის !
ზაფხული, ზღვა და ბუნებაში გასეირნება — ერთი შეხედვით, წლის საუკეთესო დროა ჩვენი საყვარელი ცხოველებისთვის. თუმცა, სანამ ჩვენ საზაფხულო სამოსს ვირგებთ, ჩვენს ოთხფეხა მეგობრებს მთელი წელი „ბეწვის ქურქი“ აცვიათ. ცხელი დღეები მათთვის ხშირად სერიოზულ გამოწვევად იქცევა ხოლმე.
როგორ ვაქციოთ ზაფხული უსაფრთხო თავგადასავლად?
ასფალტის ტესტი: როგორ დავიცვათ თათის ბალიშები?
ზაფხულის მზეზე ასფალტი, ბეტონი და ქვიშაც კი საშინლად ცხელდება. ჩვენ ფეხსაცმელი გვიცავს, ძაღლები და კატები კი პირდაპირ შიშველი თათებით ეხებიან ამ გავარვარებულ ზედაპირს, რამაც შეიძლება ძლიერი დამწვრობა გამოიწვიოს.
- 5 წამის წესი: სანამ ცხოველს გაასეირნებთ, ხელის გული დაადეთ ასფალტს 5 წამით. თუ თქვენთვის ცხელია, ესე იგი, ცხელია თქვენი ძაღლისთვისაც.
- სეირნობის დრო: შეცვალეთ გრაფიკი. გაასეირნეთ ძაღლი ადრე დილით ან გვიან საღამოს, როცა მზე ჩავა და ასფალტი გაგრილდება.
- ალტერნატივა: თუ შუადღით მაინც გიწევთ გარეთ გაყვანა, ატარეთ მხოლოდ ბალახზე ან ჩრდილში.
ბეწვის გაპარსვა: შეცდომა, რომელიც ბევრს მოსდის
როცა ვხედავთ, რომ ჰასკის, გერმანულ ნაგაზს, ან თუნდაც ფუმფულა კატას სიცხისგან ენა აქვს გადმოგდებული, პირველი ინსტინქტი მათი გაპარსვაა. ეს დიდი შეცდომაა!
- ორმაგი ბეწვი (Undercoat) როგორც თერმოსი: გრძელბეწვიან და ხშირბეწვიან ცხოველებს აქვთ ორმაგი საფარველი. ქვედა, ფუმფულა ბეწვი ზამთარში სითბოს ინარჩუნებს, ზაფხულში კი — სიგრილეს. ის იცავს კანს მზის პირდაპირი სხივებისა და დამწვრობისგან.
- ძაღლები აროფლიანდებიან ბეწვიდან: ისინი გრილდებიან სუნთქვით (ქოშინით) და თათის ბალიშებიდან. გაპარსვით მათ ბუნებრივ კონდიციონერს ართმევთ.
- რა ვქნათ სანაცვლოდ? ყოველდღიურად კარგად დავვარცხნოთ. დავარცხნით ვაცილებთ მკვდარ ბეწვს, რაც ჰაერის ცირკულაციას უწყობს ხელს.
გამონაკლისი: გაპარსვა ან მოკლედ შეჭრა შეიძლება მხოლოდ ერთშრიანი ბეწვის მქონე ძაღლებისთვის (მაგ. პუდელი, იორკი) ან იმ შემთხვევაში, თუ ბეწვი ძალიან არის აბურდული.
წყალი, წყალი დაკიდევ ბევრი წყალი!
დეჰიდრატაცია (გაუწყლოება) ზაფხულში ყველაზე დიდი მტერია.
- ხელმისაწვდომობა: სახლშიც და ეზოშიც ცივი, ახალი წყალი მუდმივად უნდა ჰქონდეთ!
- გასეირნებისას: ყოველთვის თან იქონიეთ სპეციალური სამგზავრო ბოთლი ძაღლისთვის.
- კატების კაპრიზები: კატები ხშირად არ სვამენ (მდგარ) წყალს. გამდინარე წყალი მათ მეტად იზიდავთ.
უნდა შევუცვალოთ თუ არა კვების რაციონი?
სიცხეში ცხოველები, ისევე როგორც ადამიანები, უფრო პასიურები ხდებიან და ნაკლებს მოძრაობენ.
- მადისკლება: ნუ შეგეშინდებათ, თუ ზაფხულში თქვენი ძაღლი ან კატა ულუფას ბოლომდე არ შეჭამს. ეს ნორმალურია.
- კალორიების კონტროლი: თუ ცხოველი ნაკლებს აქტიურობს და სახლში კონდიციონერთან წოლას ამჯობინებს, შეუმცირეთ ულუფა, რომ წონაში არ მოიმატოს.
- კვების დრო: აჭამეთ დღის შედარებით გრილ მონაკვეთში — დილით ადრე ან საღამოს.
ოქროსწესი: არასოდეს დატოვოთ ცხოველი მანქანაში!
ეს არის წესი, რომელიც ყველა პატრონმა ზეპირად უნდა იცოდეს. მაშინაც კი, თუ გარეთ სულ რაღაც 25°C-ია, დახურულ მანქანაში ტემპერატურა რამდენიმე წუთში 40°C-ს აჭარბებს. „მხოლოდ 5 წუთით შევალ მაღაზიაში“ შეიძლება ფატალურად დასრულდეს. თუ ცხოველის თან წაყვანა აუცილებელია, კონდიციონერი მუდმივად ჩართული უნდა იყოს.
💡 რეკომენდაცია: თუ შეამჩნევთ, რომ თქვენი ცხოველი ზედმეტად ძლიერად ქოშინებს, აქვს დორბლი, ლეთარგიულია, ან ღებინების ნიშნები აქვს, ეს შესაძლოა დასიცხვის სიმპტომები იყოს. სასწრაფოდ გადაიყვანეთ ჩრდილში, დაადეთ სველი პირსახოცები თათებსა და მუცელზე და დაუკავშირდით ვეტერინარს.
გაუფრთხილდით თქვენს ოთხფეხა მეგობრებს და გაატარეთ დაუვიწყარი, უსაფრთხო ზაფხული!